المكان: مطار كايروبار
المضيفة بصوت سرسوع محشور فيه فار من اسبوع
يعلن مطار كايروبار عن وصول الطائرة البوينج رقم تلات سبعات .. اللي بتروح ابو زعبل والمظلات .. في احدى الممرات .. وعلى المنتظرين والعاملين اخلاء كل الطرقات .. الاساسية والفرعية .. تجنبا لاى هبوطات اضطرارية .. لفقدان الكابتن لنضارته الطبية .. واصابة المساعد بتقلصات معوية .. وربنا يستر علي ركاب الرحلة ديه.
وما ان سمع المنتظرين والعاملين هذا التحذير حتى فروا من الطريق .. فرار النمل من الثريد المرشوش بريد.
وهبطت الطائرة بسلام وسط ذهول المارة .. بعد ان كسرت كام عمود انارة .. وانخلعت عجلاتها الامامية وانكفأت علي بوذها .. واخترقت الجدار ودخلت الصالة .. وطايحة في الجميع كالعربة الجرارة.
ووسط الدخان الكثيف .. قفز باب الطيارة .. برزعة قدم شديدة الجسارة .. تلاها خروج صاحبة هذه القدم الجبارة .. والتى كانت ترتدي تي شيرت برونز .. و بنطلون جينز .. وشكلها ولا المارينز .. واخذت تـُلـَوح بيديها وقدميها .. وتثرثر بلهجة اوروبية .. معلنه عن سخطها وغضبها وندمها لعدم ركوبها طائرتها الملكية.
وكان وسط جموع المنتظرين الوزير غدر الزمان و دهر زاد بنت سوزاد و شقيقة شهرزاد .. وما ان رأت شقيقتها حتى جرت عليها تتدحرج علي الارض مثل كرة البولينح المشبعة بالشحومات .. والقت مابيديها من ساندوتشات.. وهات يا احضان ويا قبلات ..
شهرزاد : اي ميس يو تو ماتش
دهرزاد بتحاول تخمن وهي مش فاهمه حاجة : الماتش انتهى بالنصر وابو تريكة جاب الكاس لمصر .. وتقول في سرها .. صحيح يا ولاد هو ده الانتماء .. يعيش حسن شحاته .. محرر فلسطين .. ومُطعم الغلابة والمساكين .
شهرزاد تلتفت حواليها وتسأل اختها : واير ايز مام اند داد
دهرزاد تاخدها اختها من ايدها وتقولها : لا الدادة في البيت .. والموضوع شكله كبير يالا بينا ع البيت .. وتقول للوزير غدر الزمان اجري شوفلنا المورد مع اي حد ... علشان نعرف نتفاهم مع البنت ... وهنستناك في العربية الجيب .
وينطلق ثلاثتهم ... صوب القصر ... بصحبة قاموس المورد ... بعد ان تأزم الموقف وتلبد ... وبعثوا يستدعوا كل المترجمين والمترجمات .. حتى يستطيعوا التفاهم مع ست البنات .
يتبع ...
6 أشباح صديقة .. ومن قلبى قريبة .:
الاشتراك في:
تعليقات الرسالة (Atom)
Empress appy يقول...
لا كملى يا شهرزاد
انتى كده شكلك داخله فى سياسه بس من بعيد
امممممممممم ولا انا فهمت غلط بقى مش عارفه احتمال اصلى دماغى ملخبطه
عموما فى انتظارك
2 مارس 2008 في 12:22 ص
Soooo يقول...
خبر ايه يا آآبي
هو انا كل ما ادخل مدونه الاقيكي معلقه قبلي .. يابنتي قومي اشتغليلك شويه وبطلي تعليقات .. ايه ده
نيجي بقى للحدوته
حلو قوي الطياره تلات سبعات .. لان فعلا هو ده انسب تشبيه على شبكة مصر للطيران الحقيقه
منتظر باقي الحدوته .. وماتتأخريش علينا تاني انتي فاهمه
والا هتلاقيني جايلك وجايب مسرور السياف
ملحوظه
هي شهرزاد نازله من غير تتالوج؟؟؟
سلاموووووووووووووز
2 مارس 2008 في 3:22 ص
Empress appy يقول...
ابعد عنى يا سوووووووووو
بصى سيبينا متناديش مسرور يخلصنا منه دلوقتى الا لما غيظ فيه شويه هههههههههه
2 مارس 2008 في 4:16 ص
momken يقول...
هذا هو تحليقى الاول فى سرب تلك المدونه الرائعه
اعجبتنى مدونتك جدا
فعلا عمل جمل
والبوست دمه زى السكر
وشهرذاد الجديده هايله
بس بتقفى عند حتت مهمه زى مسلسلات القناه الاولى بتاعه زمان ليه؟
تحياتى
2 مارس 2008 في 8:47 ص
Unknown يقول...
منتظرة سريعا الباقى فى انتظارك الاحداث بدات تسخن قوى
3 مارس 2008 في 12:24 ص
Moustafa` يقول...
متابع
انتى مشكله بجد
شكرا ً لإضفاء البسمه
فى كلمه كده غلط إملائيا ً
انكأفت .. الصح انكفأت
عاجبنى تطريز العامى بالنحوى والفصحوى مع حبه بهارات كده لزوم القافيه ( بترقيق وفتح القاف )
تحياتى كتير يا دماغ جووون
انتى صيدله بقه وده أكيد
سلام
3 مارس 2008 في 11:24 ص